नांदेड जिल्ह्यातील अनेक तालुक्यातुन चोरटी वाळू जोमात; प्रशासन कोमात
नांदेड (भगवान कांबळे): - लॉकडाऊनच्या काळातही नांदेड जिल्ह्यातील अनेक तालुक्यातुन बेकायदा वाळू वाहतुक सुरू असून विनापरवाना देशी व गावरान दारूची विक्री होत असल्याचा आरोप अनेक गावातली ग्रामस्थांनी केला आहे वाळू लिलाव झाले नसल्याने जिल्ह्यात चोरटी वाळू वाहतूक जोमात सुरू आहे. नांदेड जिल्ह्यात वाळूची वाहतूक सुरू आहे. अशा अवैध वाळू वाहतुकीकडे जिल्हा प्रशासनाचे दुर्लक्ष होत असल्याचे चित्र आहे. सध्या वाळूचे दर ३२ ते ३५ हजार रुपये प्रतिट्रकपर्यंत गेले आहेत. देशात कोरोना ची महामारी सुरू असल्याने यावर्षी वाळूचे लिलाव झालेले नाहीत. त्यामुळे नवीन बांधकामे करताना वाळूची कमतरता भासू लागली आहे.काही वाळू व्यावसायिकांनी पूर्वी मारलेल्या ठिय्यांतूनच आता जास्त भावाने वाळू विक्री होत आहे. त्यासाठी वाळूचा दर मात्र चढा राहात आहे. सध्या जिल्ह्यात नऊ ते ११ हजार रुपये ब्रासप्रमाणे वाळूची विक्री होत आहे. वाळू वाहतुकीचे अंतर वाढल्यास त्या प्रमाणात दर वाढत आहे. धर्माबाद तालुक्‍यात सर्वाधिक चोरटा वाळूउपसा होत आहे. ही वाळू नांदेड जिल्ह्यासह हिंगोली या भागात जात आहे. जिल्ह्यातील गोदावरी नदीपात्रातून उपसा होणारी वाळू तेलंगणा राज्यात पाठविली जाते. त्यासाठीही जास्त दर घेतला जात आहे. वाढलेल्या वाळूच्या दरामुळे काहींनी पर्याय म्हणून दगडांची बारीक कच वापरली जात आहे. ही कच ही ब्रासला दोन ते अडीच हजार रुपयांपर्यंत विकली जात आहे. ग्रामीण भागात वाळूअभावी बांधकामे बंद ठेवण्याचा निर्णय काहींनी घेतला आहे.
कोणत्याही टिप्पण्‍या नाहीत:
टिप्पणी पोस्ट करा