पत्रकाराला मारहाण करणाऱ्या पोलिसावर गुन्हा दाखल करा - राजेंद्र पातोडे
अकोला,ब्युरोचीफ दि. २८ :- मास्कची विक्री करतो म्हणून लातूर येथील पत्रकार किशोर सोनकांबळे यांना शिवीगाळ करून मारहाण करण्यात आली. या प्रकरणी पोलीस निरीक्षक संजय हिबारे यांच्यावर गुन्हा दाखल करून त्यांची चौकशी करण्यात यावी, अशी मागणी वंचित बहुजन आघाडीचे प्रदेश प्रवक्ते राजेंद्र पातोडे यांनी केली आहे. लातूर येथील पत्रकार किशोर सोनकांबळे यांच्या घरची परिस्थिती अत्यंत हालाखीची असल्याने ते उदरनिर्वाहासाठी मिळेल तो व्यवसाय करतात. सध्या कोरोनाच्या काळात मास्कची विक्री करून घरी जात असताना गांधी चौकात सोनकांबळे यांना पोलीस निरीक्षक संजय हिबारे यांनी अडवून मास्क विक्री करण्यास विरोध केला. त्यावर सोनकांबळे यांनी आपण चुकीचे करत नसल्याचे सांगितले. यावर संतापलेल्या हिबारेंनी सोनकांबळे यांना शिवीगाळ करून मारहाण केली, तसेच तुरुंगात टाकण्याची धमकी दिली. याप्रकरणी पोलीस निरीक्षक हिबारे यांच्यावर गुन्हा दाखल करून या प्रकरणाची चौकशी करण्यात यावी, अशी मागणी वंचित बहुजन आघाडीचे प्रदेश प्रवक्ते राजेंद्र पातोडे यांनी केली आहे. अशी माहिती वंचित बहुजन आघाडीचे राज्य प्रसिद्धी प्रमुख सुरेश नंदिरे यांनी दिली.
कोणत्याही टिप्पण्या नाहीत:
टिप्पणी पोस्ट करा